Photo Kayaki

AMARG 103

ḥmd i-rbbi 1 ḥmd i-rbbi a-ul-inu, ula kullu ma-gigi-illan, tmjjdt ism-ns iɛzzan. 2 ḥmd i-rbbi a-ul-inu, a-ur-tttut kullu timixar-ns. 3 ar-ak-itṣamaḥ f-kullu ddnub-nnk. ar-ijjujji kullu timuḍan-nnk. 4 ar-issinif ddat-nnk i-umḍḍal. ig-ak ttaj n-rrḥmt d-tayri-ns. 5 ibark kullu ussan n-tudrt-nnk. irar-ak-d afud-nnk zund jjhd l-lbaz. 6 ibidd bdda d-yan-f-iḍr lbaḍl, iḥkam s-lḥqq ifk-as taɣamt-ns. 7 rbbi imla i-musa ma-iqṣad, yadj mddn-ns ad-ẓrran ma-iskar. 8 rbbi a-igan arḥim ig aḥnin, yigat ṣṣbr-ns d-tayri-ns izgan. 9 ur-ra-n-itqama bdda ɣ-lɣaḍab, ur-rad-aɣ-ig d-willi iḥaca. 10 ur-rad-bdda-itẓi f-ddnub-nnɣ, ula-da-yaɣ-yakka f-unck lli-sthllan. 11 tigat tayri-ns f-willi-t-ituqqarn unck lli-attuyn ignwan f-wakal. 12 issaggug-n fllannɣ ddnub-nnɣ unck lli-yaggug lɣrb zɣ-ccrq. 13 iḥnnu ɣ-ɣwilli-t-ituqqarn ɣmklli itḥnnu yan ɣ-tarwa-ns, 14 acku issn ma-zɣ-ntyawskar, yissan izd akal a-nga nkkʷni. 15 hati zund tuga ad-zrayn-uwssan-nnɣ. nmɣi-d nimɣur zund ajddig n-tagant, 16 iṣuḍ-d-waḍu yawi-t, laḥ ajddig ixwu-udɣar-ns. 17 imma tayri n-rbbi ur-dars ttmi, tili dima f-willi-t-ituqqarn. ar-bdda-iskar s-ufulki-ns izgan, i-kullu tasutin n-mddn-ns, 18 i-willi umẓnin ɣ-lɛhd-ns, awin-tt bdda ɣ-luṣiyat-ns. 19 iḥkam rbbi kullu ma-illan, iskr lɛrc-ns ɣ-iggi n-ignwan. 20 ḥmdat i-rbbi a-lmalayka tjhhdnin, kunni da-isflidn i-iwaliwn n-rbbi, ar-kullu-tskarm s-mad-awn-ittini. 21 ḥmdat i-rbbi a-inmɣurn n-ignwan, kunni da-iskarn ma-gigun-ittiri. 22 ḥmdat i-rbbi a-kullu lmxluqat ɣ-kraygatt mani ɣ-ddu-ufus-ns. ḥmd i-rbbi a-ul-inu.