Photo Notnin

AMARG 107

iskkirn n-rbbi 1 alɣat rbbi acku nttan a-ifulkin, ar-bdda-iskar s-lḥnant-ns izgan. 2 alɣat rbbi kunni lli-ijjnjm, ikks-kn-d i-lhalak ig-kn ɣ-laman. 3 issmun-kn-d kullukn zɣ-tmizar aggugnin, yawi-kn-d zɣ-uẓlmaḍ ula afasi, zɣ-usɣlay n-tafukt ar amṭar-ns. 4 kra gigun ar-itlulli ɣ-ṣṣaḥra ixwan. ur-ufin tamdint ma-ɣ-a-tgguzn. 5 itɣaca-uwl-nsn tḍr-tdwast-nsn, inɣ-tn irifi ula laẓ iggutn. 6 ɣ-tnukmut-an ad-ɣran i-sidi rbbi, hati ijjnjm-tn zɣ-taɣuft-nsn. 7 yawi-tn ḥayna ɣ-yan-uɣaras inmn, aylliɣ ruḥn tamdint lli-ɣ-rad-zdɣn. 8 ad-alɣn rbbi f-lḥnant-ns da-izgan, d-lɛjayb da-iskar f-ssibt n-bnadm. 9 ar-isswa rbbi kullu wanna yaɣ irifi, ar-iccbaɛ s-lxir wanna inɣa laẓ. 10 kra gigun ityawkrraf s-ssnasl n-uwzzal, rfufnn ɣ-tillas d-umalu l-lmut. 11 ɣin a-ɣ-qaman acku ɛṣan rbbi, ḥgrn ntni luṣiyat n-walli yattuyn. 12 issiẓẓay fllasn anhataf icqan, ḍrn s-wakal laḥ ma-tn-itɛawann. 13 ɣ-tnukmut-an ad-ɣran i-sidi rbbi, hati ijjnjm-tn zɣ-taɣuft-nsn. 14 issufɣ-tn-d zɣ-tillas ula amalu l-lmut, ibbi ssnasl-nsn irẓm-asn. 15 ad-alɣn rbbi f-lḥnant-ns da-izgan, d-lɛjayb da-iskar f-ssibt n-bnadm. 16 ar-irẓẓa rbbi iflwan n-wanas, ar-itbbi ula ifggign n-uwzzal. 17 kra gigun iwrri inufl s-ddnub-ns, hrcn acku ffuɣn zɣ-iwaliwn n-rbbi. 18 krhun amccu akmurn-in s-lmut. 19 ɣ-tnukmut-an ad-ɣran i-sidi rbbi, hati ijjnjm-tn zɣ-taɣuft-nsn. 20 yazn-d awal ḥayna ijjuji-tn, ikks-tn-d i-lhalak n-umḍḍal illasn. 21 ad-alɣn rbbi f-lḥnant-ns da-izgan, d-lɛjayb da-iskar f-ssibt n-bnadm. 22 ad-fkn i-rbbi tiwafkiw n-ccukr, ar-ttirirn bdrn kullu iskkirn-ns.
 23 ar-ssudun wiyyaḍ ɣ-wanawn f-imdwan, ar-saɣn ar-zznzan ɣ-tama n-waman. 24 ɣ-umda idran a-ɣ-ẓran lɛjayb n-rbbi, ɣin a-ɣ-ssmaqqln jjhd n-iskkirn-ns. 25 yazn-d awal yawi-d aḍu itjhhdn, issduy amda issattuy taḍangiwin. 26 ar-aqlayn ar iggi ar-tgguzn ar izdar, ɣuwḍn bahra akmurn ad-xsin. 27 ar-tmllilin ar-ṭṭarn zund iskayriyn, duhdun ur-akkʷ-ssinn ma-rad-skrn. 28 ɣ-tnukmut-an ad-ɣran i-sidi rbbi, hati ijjnjm-tn zɣ-taɣuft-nsn. 29 issfsa aḍu issbidd taḍangiwin, 30 isshnnu ul-nsn s-umda izgan. yawi-tn ɣ-laman ar lmrsa lli-ran. 31 ad-alɣn rbbi f-lḥnant-ns da-izgan, d-lɛjayb da-iskar f-ssibt n-bnadm. 32 ad-mjjdn rbbi ɣ-gr willi-t-itɛbadn, ḥmdn-t ɣ-umnaggar n-imɣarn n-mddn-ns. 33 issruḥ-d taɣart i-isaffn n-waman, irar talɛinin gnt igʷḍyan irufan. 34 lliɣ iẓra lxcant n-willi ɣin zdɣnin, irar akal icwan ig amlal imarɣn. 35 ifk talɛinin i-ṣṣaḥra irufan, irar lburr iqqurn ig timdiwin n-waman. 36 yawi-d s-wakal-an ɣwilli inɣa laẓ, bnun yat-tmdint a-gis-zdɣn. 37 awin-d amud ẓẓun asɣar n-waḍil, asin timixar zɣ-igran-nsn. 38 ibark-tn rbbi igatn darsn tarwa, ur-yudji aṭṭan a-ilkm lksibt-nsn. 39 lliɣ ḍrn ntni nrun-tn ayt-imiɣ, knun ɣ-ddu taẓayt n-tkrrayt ula tarfufnt, 40 issufɣ rbbi ɣwilli fllasn itakʷln, yazn-tn ad-jlun ɣ-lxla yaggugn. 41 ikks-d ɣwilli dɛfnin i-tnukmut icqan, issigt-asn tarwa zund lksibt-nsn. 42 frḥn ayt-ufulki s-mayd iskr rbbi, imma ayt-lxcant laḥ-asn ma-ttinin. 43 yan dar lɛaql, a-stt-yawi ɣ-kullu mayad, iswangm ɣ-lḥnant n-rbbi da-izgan.