Photo Jerzy Strzelecki

AMARG 139

tawassna 1 wa-rbbi tẓrit agʷns-inu tissant-iyi, 2 tissant iɣ-gawrɣ ula iɣ-nkrɣ, tissand-d zɣ-tuggugt ma-ɣ-a-swingimɣ. 3 tissant iɣ-ffuɣɣ ula iɣ-gnɣ, tissant a-rbbi kullu mad-skarɣ. 4 ur-ta-immuss ils-inu, tssnt a-rbbi kullu ma-rad-iniɣ. 5 tsutlt-iyi bdda zɣ-kraygatt tasga, tḥṣart flla s-jjhd n-ufus-nnk. 6 tɛjjbɣ a-rbbi ɣ-twassna-yad-nnk, tattuy bahra flla ur-as-ẓḍarɣ. 7 manis rad-dduɣ ad-anfɣ i-rruḥ-nnk? ula manis rad-rwlɣ ad-fllak-rgsɣ? 8 iɣ-ɣliɣ s-ignna, ɣin a-ɣ-tllit kiyi. iɣ-gnɣ ɣ-umḍḍal ula ɣin tllit gis. 9 iɣ-nkrɣ aylɣ s-usɣlay n-tafukt, ula ɣin afus-nnk a-ra-yyi-iguwwd. 10 iɣ-bbiɣ amda zdɣɣ-n ɣ-tsga yaggugn, ula ɣin ra-yyi-gis-yamẓ-ufus-nnk afasi. 11 iɣ-ḍalbɣ tillas a-yyi-dlnt, ɣ-iẓri-nnk a-rbbi ur-akkʷ-llasnt. 12 iɣ-ḍalbɣ azal a-ywrri ig iḍ, ɣ-dark a-rbbi iga iḍ zund azal, tillas ula tifawt yan ad-gant ɣ-dark.
 13 kiyi a-iskrn igzman n-ddat-inu, tzzdit-iyi-n s-tntla ɣ-waḥlig n-immi. 14 ḥmdɣ-k f-lquwwa-nnk ula lmjd-nnk. issanɣ iskkirn-nnk lɛjb ad-gan. 15 lliɣ-iyi-di-txlqt ɣ-tdrut n-ddunit, ur-fllak-ntiln ixsan n-wazzan. tɛdlt iẓuran-inu ɣ-uruku irgsn, 16 ar-iyi-tmnadt lliɣ ur-ta-lulɣ. tarat flla ussan n-tudrt-inu kullutt. ɣ-warra-nnk a-ɣ-llan ur-ta-ẓriɣ tifawt. 17 tɛjjbɣ a-rbbi ɣ-iswingimn-nnk. kraygatt kra illan ar-gis-tswingimt. 18 iɣ-tn-kullu-ssmunɣ rad-igatn f-umlal, sul ur-rad-issanɣ mamnk a-tgit kiyi. 19 amar yufan a-thlkt gar mddn a-rbbi, tssittit-n flla ɣwid dar tɛzza-tnaɣa. 20 rurn-in srk tiɣurdin ar-gik-rggmn. 21 ur-a-tiḥmalɣ ɣwilli-k-ur-ittirin, ula ṣbrɣ i-willi srk yusin tanuwwact. 22 ur-a-tn-ttiriɣ ula ra-sar-tn-iriɣ. 23 wa-rbbi siggl gigi tissant ul-inu. arm-iyi tissant mad-swingimɣ, 24 tẓrt is-gigi-illa kra yʷxcnn, tguwwdt-iyi-bdda ɣ-uɣaras idumn.