Photo Fabrice Cadou

AMARG 19

timuɣra n-rbbi 1 ignwan a-issmalan timuɣra n-rbbi, tattuyt ar-ttbrraḥ s-iskkirn-ns. 2 azal ar-yakka laxbar i-uzal, d-iyḍ ar-tn-imala i-iyḍ ɣ-tgira-ns. 3 ur-nsfld i-iwaliwn ula tajmmaɛt, 4 imma timitar-nsn kkant kraygatt mani, truḥ-twaɣra-nsn ttmi n-wakal. iskr rbbi ɣ-ignna tazdɣt i-tafukt. 5 zikk a-tnkkr zund asli zɣ-tgmmi, s-lfrḥ a-s-a-ttazzal zund yan itjhhdn. 6 hati ar-di-taqlay zɣ-ttmi n-ignwan, tkl ard-di-tlulli s-ttmi yaḍni. ur-illi ma-ra-irgs zɣ-trɣi-ns iḥrran. 7 hati ifulki-wawal n-rbbi, ar-bdda-issdus ulawn-nnɣ. hati zgan-warratn n-rbbi, gn lfhmt iggutn i-ibujadiyn. 8 hati ɣʷẓannt-tnbaḍin n-rbbi, ar-bdda-ssfraḥnt tasa-nnɣ. hati cwant luṣiyat n-rbbi, ar-bdda-rẓẓmnt alln-nnɣ. 9 hati hiyyant-tksaḍ n-rbbi, rad-bdda-yili ma-t-itiksaḍn. hati s-lḥqq a-s-a-itḥkam rbbi, ar-aɣ-yakka mad-aɣ-igan. 10 iɛzzu-wawal-nnk uggʷar n-uwrɣ, iɛzzu f-kigan n-uwrɣ iṣfan. imim f-tammnt ula timqqa n-imcḍ. 11 ar-ithdu willi-k-itɛbadn. d-wanna srs iskarn, lxir a-rad-as-yili. 12 ur-nssin lɛib lli-intln ɣ-uwl-nnɣ. ssɣus-iyi a-rbbi zɣ-ma-gigi-irgsn. 13 tḥṣart-iyi a-ur-ffuɣɣ zɣ-wawal-nnk, ula ḥkamn gigi gar iskkirn. ɣmkad a-s-rad-gɣ yan dar ul iṣfan, ula rad-jluɣ zɣ-uɣaras-nnk. 14 rar iwaliwn n-ils-inu d-iswingimn n-uwl-inu a-k-rḍun a-sidi rbbi, acku kiyin a-igan ajarif l-laman tgt anjjam-inu.