Photo Maureen (Buffalo)

ma-zɣ-rad-iksaḍɣ? 1 rbbi a-igan tifawt-inu ula anjjam-inu. ma-zɣ-rad-iksaḍɣ? rbbi a-igan lbrj-inu iḥḍu tudrt-inu. ma-ra-yyi-issiwd? 2 waxxa-d-uckan gar mddn a-yyi-hlkn, rad-ɛttrn ḍrn inuwwacn-an. 3 d-waxxa-yyi-sutln ayt-imiɣ ggutnin, ur-ra-yiksaḍ-uwl-inu. waxxa-d-kullu-ɣlin s-uwzzal d-imqlad, rbbi a-s-a-tzɛamɣ. 4 ḍalbɣ zɣ-rbbi ɣir yat-tɣawsa. ɣir nttat ad-riɣ. ḍalbɣ-as ad-zdɣɣ ɣ-tgmmi-ns tamẓlayt kullu ma-rad-sulɣ, lhuɣ s-ma-t-irḍan ɣ-illiɣ illa nttan, issanɣ tamimt-ns. 5 ra-yyi-iḥḍu rbbi ɣ-ddu-tduli-ns ɣ-uzmz n-tnukmut. rad-bdda-yyi-issntal ɣ-untal-ns izgan, ig-iyi-n f-ujarif yattuyn l-laman, 6 yall ixf-inu f-willi-yyi-sutlnin. rad-tmjjadɣ rbbi s-lfrḥ iggutn, ssakmurɣ-as-n tiwafkiw ɣ-untal-ns amẓlay, asiɣ amarg ayrirɣ i-rbbi. 7 sfld-iyi a-rbbi, hati ɣriɣ-ak-n. ḥnnu flla tɛawnt-iyi. 8 tnnit-iyi a-rbbi “akmur-d tissant-iyi.” hati kiyi a-s-riɣ a-n-akmurɣ a-rbbi. 9 a-ur-twrrit taggugt-n zɣ-gigi. hati kiyi a-igan lɛawan-inu. a-ur-iyi-tagʷit tbzgt flla tflt-iyi. hati kiyi a-igan anjjam-inu. 10 iɣ-iyi-akkʷ-ifl baba ula immi, hati kiyi a-rbbi ra-yyi-bdda-tirit. 11 ml-iyi a-rbbi ma-gigi-tqṣadt, tguwwdt-iyi bdda ɣ-uɣaras yastwan, ar-iyi-tssinift i-willi-yyi-tkrhunin. 12 a-ur-iyi-tflt ɣ-ufus n-inuwwacn lli-flla-sskirkisnin ar-gigi-rggmn. 13 umnɣ is-rad-ẓrɣ ɣ-tudrt n-ddunit-ad lbaraka n-rbbi. 14 amẓ ɣilad ɣ-rbbi, tssdust ul-nnk, tkklt bdda f-rbbi.

AMARG 27