AMARG 32

tasaɛt n-taɣuft 1 ambarki a-iga wanna mi iṣamḥ rbbi f-ddnub-ns, issitti fllas ɣaylli-t-issḥccamn. 2 ambarki a-iga wanna mi ur-iḥasb rbbi lmɛṣyat-ns, ula sul qaman irkan ɣ-uwl-ns. 3 lliɣ ur-ta-yak-qrraɣ tmda-gigi-kullu-tdwast, ha-yyi ar-nddrɣ ass kullut. 4 ɣ-iyḍ ula azal iẓẓay-flla-ufus-nnk a-rbbi. ɣmklli itsllaw-usɣar ɣ-ṣṣif iḥrran ad-sllawn ixsan-inu. 5 d-ɣakudan a-yk-nniɣ mamnk ad-ffuɣɣ zɣ-wawal-nnk, ur-sul-ḥḍiɣ maylli-yyi-issrkan. iniɣ-ak a-rbbi “tʷgraẓ-iyi f-maylli skrɣ yʷxcn.” d-ɣakudan a-rbbi a-flla-tssittit taẓayt n-ddnub-inu. 6 ɣ-tasaɛt n-taɣuft a-ɣ-a-yk-n-aqran winnk, ur-ra-tn-tadjt a-tn-ilkm-unggay l-lɛqubit. 7 kiyi a-igan antal-inu tḥḍut-iyi ɣ-tasaɛt n-tnukmut, tsutlt-iyi s-imurign n-sslamt. (yini-yyi rbbi:) 8 rad-ak-mlɣ aɣaras lli-k-id-iqqann, iniɣ-ak ula mamnk a-gis-tfttut. 9 a-ur-tgm imddila zund agmar d-usrdun, ar-skarn s-ifaddn ma-ira siditsn, s-ulgammu d-twuriyt a-s-a-gisn-itḥkam. 10 ra-tigat-tguḍi i-willi rurnin tiɣurdin s-rbbi. imma willi srs umnnin tayri-ns izgan ad-asn-ilullin. 11 frḥat s-rbbi tfrḥm s-uggʷar, kunni da-iftan ɣ-uɣaras n-ufulki. tallm awal-nnun tirirm i-rbbi, kunni da-iṭṭafn ul iṣfan.