Photo Jimfbleak

AMARG 42

a-ul-inu 1 ɣmklli ittiri-uẓnkḍ lɛin zɣ-ftan-waman, ɣmkan a-k-ttiriɣ a-rbbi. 2 ha-yyi yaɣ-iyi irifi-nnk a-rbbi iddrn. managu ra-yyi-tadjt a-n-dik-mnaggarɣ akmurɣ-n srk a-rbbi? 3 ɣ-iyḍ ula azal imṭṭawn a-igan tirmt-inu. ar-iyi-ttinin bdda “manza rbbi-nnk?” 4 ar-ttbbi tasa-nu ɣakud nna-d-swingimɣ ussan-an ɣ-a-tmunuɣ d-aytma ggutnin. ar-asn-zgguruɣ s-tgmmi tamẓlayt, ar-ntall awal-nnɣ ar-ntalɣ rbbi, ar-as-nttirir s-imurign d-lfrḥ. 5 wa-ul-inu, max a-ki-taɣ-tguḍi? max aylliɣ tɣufit ɣ-ugʷns-inu? rju-n ɣilad ɣ-rbbi, acku rad-as-daɣ-tḥmadɣ. nttan a-igan anjjam-inu ig rbbi-nu. 6 wa-rbbi kiyi a-ɣ-a-swingimɣ, aḥ-inu zugɣ tnɣ-iyi-tguḍi, 7 tawi-yyi zund anggay n-wasif n-urdun, zund aman ḍrnin zɣ-ḥarmun ɣ-udrar n-miṣɛar. 8 ɣ-uzal a-flla-ttili tayri n-rbbi, d-iyḍ s-imurign a-s-a-yas-ttirirɣ. ar-tẓallaɣ i-walli-yyi-yakkan tudrt. 9 sqsaɣ rbbi lli-yyi-igan ajarif l-laman, “max aylliɣ-iyi-tflt? max a-tudjit ayt-lɛar a-yyi-tnɣadn?” 10 ar-iyi-brrin ntni s-ṭṭnẓ-nsn. ar-iyi-ttinin bdda “manza rbbi-nnk?” 11 wa-ul-inu, max a-ki-ttaɣ-tguḍi? max aylliɣ tɣufit ɣ-ugʷns-inu? rju-n ɣilad ɣ-rbbi, acku rad-as-daɣ-tḥmadɣ. nttan a-igan anjjam-inu ig rbbi-nu.