Photo Vialut

AMARG 62

ur-sar-asusɣ 1 rbbi waḥdut ad-dar-siggilɣ asunfu, dars a-ɣ-ṭṭafɣ laman. 2 rbbi waḥdut a-igan ajarif-inu ig lbrj ig antal-inu, ur-sar-mmussiɣ. 3 ar managu a-ra-tirim a-ttakʷlm f-bnadm, tirim a-yyi-tssḍrm zund aɣʷrab ikʷnan, zund tabya ihrmn? 4 ar-kn-itɛjjab a-taddrm tikrkas, tskrm f-a-yyi-di-tgrm zɣ-tarigt-inu. da-takkam tamimt s-ils imma ul iɛmmr s-wasmmum. 5 rbbi waḥdut ad-dar-siggilɣ asunfu, d-nttan a-ɣ-n-giɣ rrja. 6 rbbi waḥdut a-igan ajarif-inu ig lbrj ig antal-inu, ur-sar-asusɣ. 7 rbbi waḥdut a-ra-yyi-issbidd ɣ-laman, d-nttan a-ra-issattuy ism-inu, ig ajarif izgan ig azwag-inu. 8 way-aytma tiqat ɣ-rbbi kraygatt tasaɛt, tinim-as f-kullu ma-issɣufun ul-nnun, nttan a-ɣ-a-ntzawag. 9 hati amẓluḍ zund tunfust a-izray, imma bu-wayda tawargit ka-iga. ntni s-sin hatin fsusn f-yat-tunfust, ar-srsn-yaqlay lmizan. 10 a-ur-tbnnum s-ma-di-tkkism s-ifaddn, ula-da-ttawim rrja s-ma-di-tukʷrm. iɣ-d-yucka lxir iggutn a-ur-fllas-tskrm. 11 hati yat-twal isawl sidi rbbi, tis snat-twal sfldɣ-as inna, nttan a-bdda-iḥkamn ɣ-kullu ma-illan. 12 d-nttan ad-aɣ-iran s-lḥnant-ns izgan, d-nttan a-itxllaṣn i-kraygatt yan f-ma-iskr.