Photo David Dennis

AMARG 63

nkrɣ zikk 1 wa-rbbi tgit rbbi-nu, nkrɣ zikk ar-srk-siggilɣ. ul-inu inɣa-t irifi-nnk, zund akal iqqurn s-irifi. tɣaca ddat-inu s-umarg-nnk, zund illi ur-jju-kkin-waman. 2 riɣ a-n-dik-iliɣ ɣ-udɣar-nnk, ssmaqqlɣ ɣin taḥkimt l-lmjd-nnk. 3 ujadɣ a-k-tmjjadɣ a-rbbi, ha-tayri-nnk tuf dari tudrt, 4 ra-k-talɣɣ kullu ma-rad-ddrɣ, mdiɣ-ak-n ifassn ẓẓallɣ. 5 tɛmmrt ul-inu s-lxir-nnk. asiɣ-ak amarg-ad s-lfrḥ. 6 ktiɣ-k-id ɣ-tizgag n-iyḍ. kiyi a-ɣ-a-swingimɣ ɣ-tisi. 7 kiyi a-igan lɛawan-inu, d-umalu-nnk a-ɣ-a-ttirirɣ. 8 ul-inu iɣwi bdda gik, d-ufus-nnk a-yyi-bdda-yusin. 9 ɣwilli-yyi-inuwwan s-lhalak, ra-n-tyawgarn s-tdrut n-wakal, 10 rad-ḍrn ɣ-imiɣ ccn-tn-uwccann. 11 ifrḥ-ugllid s-mayd iskr rbbi, alɣn-k ɣwilli uqqrnin ism-nnk. fssan ɣwilli fllak sskirkisnin.