AMARG 90

ar-zrayn-uwssan-nnɣ 1 wa-rbbi kiyi a-igan azwag-nnɣ zɣ-tasut n-tasutin. 2 ɣ-ur-ta-luln idrarn ula tskrt akal tkkit-ttin bdda tgit rbbi, ra-tgt rbbi dima. 3 ar-ttrarat imzdɣn n-ddunit s-wakal, tinit “wrryat a-tarwa n-bnadm.” 4 alf n-usggʷas gan ɣ-iẓri-nnk zund iḍgam lli-izrin zund tasaɛt n-iyḍ. 5 da-ttawit bnadm zund anggay n-wasif, nzri kullwaɣ zund tawargit, zund tuga imɣin zikk ṣbaḥ. 6 tmɣi-d zikk tnkr tut s-ujddig, tsllaw tiqar s-tdggʷat. 7 ntthlk s-lɣaḍab nɣuwḍ ɣ-ssxṭ-nnk, 8 tssbayynt kullu ddnub-nnɣ ɣ-lgddam-nnk. tzzudft a-rbbi ɣaylli idln ɣ-uwlawn-nnɣ, 9 s-lɣaḍab a-s-a-ttbbit tudrt-nnɣ, zund tunfust ad-zrayn-uwssan-nnɣ. 10 sa n-id-mraw ad-gan isggʷasn n-bnadm, nɣd tam id-mraw i-yan iṣḥan. ur-gisn-nzzri abla takrrayt d-tmmara, ḥayna-s-tmman nayl zɣ-ɣi. 11 ma-issnn jjhd n-ssxṭ-nnk a-rbbi? ma-issnn tiksaḍ l-lɣaḍab-nnk? 12 sslmd-aɣ a-rbbi a-ntḥasab ussan-nnɣ afad a-iɛmmr-uwl-nnɣ s-tḥkimt-nnk. 13 ar managu a-rbbi a-ra-fllannɣ-tili tagat? ḥnnu fllannɣ twrrid-d s-ismgan-nnk. 14 tɛmmar-aɣ zikk s-tayri-nnk izgan, a-nfrḥ ar-ak-nttirir kullu ussan-nnɣ. 15 tfkt-aɣ-d a-rbbi ussan l-lfrḥ unck n-win-tguḍiwin lli-zɣ-aɣ-tzzrit. tfkt-aɣ-d a-rbbi isggʷasn l-lfrḥ unck n-win-tnukmut lli-fllannɣ-izrin. 16 tmlt-aɣ-d a-rbbi lquwwa n-iskkirn-nnk, tssbayynd-d lmjd-nnk i-tarwa-nnɣ. 17 a-fllannɣ-yili-ufulki n-sidi rbbi, tbarkt iskkirn n-ifassn-nnɣ. d-iskkirn n-ifassn-nnɣ, bark-tn a-rbbi.